Someran riĉon Aŭtuna frost' ekstermis: Krei kaj murdi, Ho vi Natur' kruela, La Homo de vi lernis! |
Malami multon Povas la hom' sovaĝe. Ami li povas Sole sin mem; eĉ tion Li faras tre malsaĝe. |
Aer-atako. Laŭ la ĵurnalraporto Mil homoj mortis. Konsolo: ĉiu mortis Per unu sola morto. |
Mil homoj mortis Kaj trovas vi motivon Por la konsolo: Ja ĉiu perdis sian Unu kaj solan vivon! |
De lud' kun fajro Ni gardas la infanon. Al homoj kia Senzorga Patro donis Bombojn kaj aeroplanon? |
Ami la homon, Jen malfacila tasko. Ne pli facila, Ol kisi amfervore Amaton en gasmasko. |
La hom' la vivon Laŭ mondkoncept' aranĝas, Ne povas agi Kontraŭ la konvinkiĝo, Prefere li ĝin ŝanĝas. |
Malsataj ratoj En plena sil' da rizo Batalas sange Por unu sola grajno: Ekonomia krizo. |
La patroj sangas Por la futur' de l' filoj, La filoj sangas Pro la pase' de l' patroj: Jen saĝo de l' armiloj. |
Eraris Eva Pri l' pom' en paradizo, Ĉar ja ne povas Ĝis nun la hom' distingi Inter malbon' kaj miso. |
El lunradioj Arĝentan ŝnuron ligi, Sur lun' kreskanta Pendigi min, kaj langon Moke je l' mond' eligi... |